Londonyň OXO galereýasynda ýabany tebigatyň gülkünç suratlaryna bagyşlanan Nikon Comedy Wildlife Awards 2025 bäsleşiginiň ýeňijileri yglan edildi. Şu ýyl bäsleşige 108 ýurtdan 10 000 töweregi iş gelip gowuşdy we olardan emin agzalary 45 finalçyny saýlady.
«Süýdemdirijiler» kategoriýasynda baş baýragy we birinji orny britaniýaly fotosuratçy Mark Met-Konuň «Kak bäşi» atly suraty aldy. Suratda Ruandadaky Wirunga milli seýilgähinden ýaş gorilla keýpiçag ýöräp barýar we ol üýtgeşik çeýeligi görkezýär.
Fotosuratçynyň aýtmagyna görä, ol Wirunga daglarynda Amahoro gorillalarynyň maşgalasyny surata düşürdi.
«Biz gorillalaryň maşgalasynyň gözleginde dumanly daglara syýahat etmek bilen ýatdan çykmajak dört güni geçirdik. Bir gün biz tokaý meýdanynda ýygnanan uly maşgala toparyna gabat geldik. Uly gorillalar arkaýyn iýmit gözläp ýördi, çagajyklar bolsa oýnaýardy. Bir ýaş erkek gorilla has aýratyn tapawutlandy: aýlandy, togalandy we aýagyny ýokaryk galdyrdy. Onuň akrobatikasyna syn etmek gyzykly boldy we men onuň oýunçy ruhuny surata düşürip bilendigime begenýärin» - diýip, Kon aýtdy.
Şeýle-de, guramaçylar aýry-aýry kategoriýalarda laureatlary yglan etdi. Bäsleşik şadyýan suratlar arkaly ýabany tebigata ünsi çekmek bilen, gülkini möhüm ekologiýa missiýasy bilen utgaşdyrýar.
«Balyklar we beýleki suwasty jandarlar» kategoriýasynda ýeňiji. «Ýyrş-ýyrş», Jenni Stok (Beýik Britaniýa)
«Amfibiýalar, süýrenijiler we mör-möjekler» we «Ýaş fotosuratçy» (16 ýaşa çenli) kategoriýalarynda ýeňiji. «Zorluk bilen çokundyrma», Greýson Bell (ABŞ).
«Ýaş fotosuratçy» (25 ýaşa çenli) kategoriýasynda ýeňiji. «Tans meýdançasyna çykyş – tilkiler breýk-tansda bäsleşýär», Pola Rustemaýer (Germaniýa)
Eminleriň ýokary bahasy. «Höwürtgäm haýsy tarapda?», Elison Tak (Beýik Britaniýa)
Eminleriň ýokary bahasy. «Gidiň!», Annet Kirbi (Awstraliýa)
Eminleriň ýokary bahasy. «Aaaaaawa – eje», Mark Met-Kon (Beýik Britaniýa)
Eminleriň ýokary bahasy. «Hor», Melin Elwanger (ABŞ).
