Hyundai 2021-nji ýylda ilkinji gezek yglan edilen MobED (Mobile Essentric Droid) ykjam platformasynyň köpçülikleýin önümçilik wersiýasyny hödürledi. Ýokary geçijilik ukyby bilen tapawutlanýan bu robot arabajygy ownuk ýükleri eltip bermek ýaly dürli wezipeler üçin niýetlenendir.
Hyundai 2026-njy ýylyň birinji ýarymynda pilotsyz platformalary öndürip we satyp başlamagy meýilleşdirýär.
Döredijiler üýtgeşik podweskany MobED-iň esasy artykmaçlygy hökmünde görkezýärler. Elektronika her tigriň öwrülme burçuny we beýikligini garaşsyz sazlamaga mümkinçilik berýär. Bu aýratynlyk platformanyň eňňit burçuny üýtgetmäge ýa-da, tersine, ony islendik üstde (örtügiň üstünde) pugta gorizontal ýagdaýda saklamaga mümkinçilik berýär. Tigirleriň innowasion berkidilmegi arkaly MobED dürli päsgelçilikleri daşalýan ýüke zyýan ýetirmezden ýeňip geçip biler.
Kompaniýa iki wersiýany hödürledi: "Basic" we "Pro". Uzynlygy 1150 millimetr we beýikligi 430 millimetr, öz agramy 78 kilograma barabar bolan "Basic" wersiýa 57 kilograma çenli ýüki daşap bilýär. "Pro" wersiýasy has beýik (650 millimetr) we agyr (88 kilogram), ýöne onuň ýük göterijiligi 47 kilograma deňdir, bu bortdaky enjamlaryň sanynyň artmagy bilen düşündirilýär.
Eger "Basic" wersiýasy hereket etmek üçin operatoryň uzakdan dolandyryş gözegçiligini talap edýän bolsa, "MobED Pro" doly awtonomlyk (özbaşdaklyk) funksiýasyna eýedir. Muňa ýetmek üçin robot arabajygy kameralaryň, lidar datçikleriň we emeli aň elementleri bolan programma üpjünçiliginiň toplumy bilen enjamlaşdyrylandyr. Bu enjam oňa päsgelçilikleri netijeli tanatmaga we olardan aýlanyp geçmek üçin karar kabul etmäge mümkinçilik berýär.
Hyundai MobED platformasyny ilkinji nobatda eltip beriş rowerleri üçin esas hökmünde göz öňünde tutýar, ýöne geljekde ol islenilýän beýleki maksatlar üçin hem uýgunlaşdyrylyp bilner.
