“Red Bull” toparynyň sürüjisi Maks Werstappen we “Ferrariniň” sürüjisi Lýuis Hemilton “Maklarenden” täze çempion Lando Norrisiň titul üçin uly bonus alandygyna garamazdan, 2025-nji ýylda “Formula-1-iň” sürüjileriniň gazanç reýtinginde ilkinji iki orny eýeledi. Forbes ýaryşa gatnaşyjylaryň girdejilerini olaryň esasy töleglerini we dürli bonuslaryny göz öňünde tutup hasaplady.
Neşiriň maglumatlaryna görä, Werstappen şu möwsümde 76 mln dollar (65 mln dollar – zähmet haky, 11 mln dollar – bonus) gazandy. Hemiltonyň girdejisi 70,5 mln dollar (70 mln dollar – zähmet haky, 0,5 mln dollar – bonus) diýlip hasaplanýar. Ol möwsümi şahsy sanawda altynjy orunda tamamlady we 44 ýylda tutuş möwsümde bir gezek hem münbere çykmadyk ilkinji sürüji bolup, “Ferrariniň” antirekordyny goýdy.
Şu ýyl karýerasynda ilkinji çempionlyk titulyny gazanan “Maklareniň” sürüjisi Lando Norris 57,5 mln dollar bilen üçlügi jemledi. Onuň zähmet haky 18 mln dollar bolup, 39,5 mln dollar möçberde bonus gazandy. Şolardan 10 mln dollary çempionatdaky ýeňiş üçin berildi.
Iň köp girdeji gazanan sürüjileriň bäşligine 36,5 mln dollar (10 mln dollar – zähmet haky, 27,5 mln dollar – bonus) bilen Norrisiň topardaşy Oskar Piastri we 30 mln dollar (tutuş mukdar – zähmet haky, bonussyz) bilen “Ferrariniň” sürüjisi Şarl Lekler hem girdi.
Forbes boýunça 2025-nji ýylda “Formula-1-iň” sürüjileriniň gazanç reýtingi:
- ·Maks Werstappen (Red Bull) – 76 mln dollar;
- ·Lýuis Hemilton (Ferrari) – 70,5 mln dollar;
- ·Lando Norris (Maklaren) – 57,5 mln dollar;
- ·Oskar Piastri (Maklaren) – 36,5 mln dollar;
- ·Şarl Lekler (Ferrari) – 30 mln dollar;
- ·Fernando Alonso (Aston Martin) – 26,5 mln dollar;
- ·Jorj Rassell (Mersedes) – 26 mln dollar;
- ·Lans Stroll (Aston Martin) – 13,5 mln dollar;
- ·Karlos Saýns (Uilýams) – 13 mln dollar;
- ·Andrea Kimi Antonelli (Mersedes) – 12,5 mln dollar.
