2026-njy ýylyň 7-nji ýanwarynda planetalaryň ýörişi bolar: Gün, Wenera we Mars bir hatara diýen ýaly düzüler, olaryň arasyndaky burç aralygy bolsa bir gradusa çenli azalar. Bu astronomik hadysanyň indiki gezek diňe XXIII asyrda gaýtalanmagyna garaşylýar diýip, RYA-nyň Kosmos gözlegleri institutynyň we Gün-Ýer fizikasy institutynyň metbugat gullugy habar berdi.
6 – 8-nji ýanwarda Gün bilen bellenilen planetalaryň arasyndaky burç aralygy bir gradusdan hem az bolar. Hünärmenleriň maglumatlaryna görä, soňky 500 ýylda şeýle waka bary-ýogy üç gezek hasaba alyndy: 1669-njy, 1682-nji we 1968-nji ýyllarda. Häzirki müňýyllykda bu hadysa diňe dört gezek bolar: 2026-njy ýylyň ýanwarynda, 2267-nji ýylyň iýunynda, 2324-nji ýylyň dekabrynda we 2623-nji ýylyň dekabrynda.
Häzirki wagtda Mars we Wenera Güne ýakynlaşyp başlady. Häzir planetalar, takmynan, 10 gradus aralykda ýerleşýär. Täze ýyl gijesine çenli olaryň arasyndaky aralyk iki-üç gradusa çenli azalar, 1 – 1,2 gradusa çenli iň ýokary wizual ýakynlaşma bolsa 6-njy ýanwardan 8-nji ýanwar aralygynda bolar.
Soňra 22-nji ýanwarda Wenera bilen Marsa Merkuriý hem goşular. Planetalaryň üçüsi-de Güne iň az ortaça aralykda ýerleşip, romb şekilini emele getirer. Wifleýem ýyldyzyny ýada salýan indiki şeýle şekil diňe 2235-nji ýylyň iýunynda bolup biler.
