Şu gün Las-Wegasda (ABŞ) şu ýylyň jemleýji ýaryşy UFC 323 geçirildi. Esasy söweşde russiýaly söweşiji Pýotr Ýan (20-5) gruziýaly Merab Dwalişwiliden (21-5) üstün çykyp, has ýeňil agramda (61,2 kg çenli) UFC-niň çempiony titulyny gazandy. Ol bu gezek 2023-nji ýylda Dwalişwiliden ýeňlendigi üçin öç aldy.
Söweş bäş raund dowam etdi. Ýan öz garşydaşyndan has işjeň hereket etmäge çalyşdy we yzly-yzyna urgy urdy. Birinji raundda ol gruziýaly söweşijini sag eli bilen urup silterledi. Şondan soň Merab garşydaşyny birnäçe gezek partere geçirmäge synanyşdy, ýöne Ýan ynamly gorandy. Üçünji raundda Pýotr aýagy bilen garşydaşynyň böwrüne güýçli urgy urdy. Şondan soň ol söweşiň gidişini ynamly saklady.
Bäş raundyň jemi boýunça eminler ýeňşi Pýotr Ýana berdi. Bu ýeňiş onuň üçin yzygider dördünji boldy, ol çempionlygy yzyna gaýtaryp aldy. Dwalişwili üçin bu titulyň dördünji goragydy, ozal ol Umar Nurmagomedowdan, Şon O’Melliden we Kori Sendgahenden üstün çykdy.
Ýene bir esasy söweşde iň ýeňil agramda çempion Aleksandr Pantoža (Braziliýa) Joşua Wana (Mýanma) garşy söweşde guşagy gorady. Söweş Wanyň birinji raundyň eýýäm 26-njy sekuntynda ýeňiş gazanmagy bilen tamamlandy: haý-kik urgusyndan soň Pantoža eliniň üstüne ters düşüp, tirsegini çykardy. Joşua Wan garşydaşynyň şikesiniň agyrdygyna düşünip, ony urmakdan saklandy. Ahyrynda eminler ýeňşi Wana berdi, Pantoža bolsa titulyny ýitirdi. Braziliýaly söweşiji karýerasynda altynjy ýeňlişine sezewar bolup, sekiz ýeňişden ybarat tapgyrynyň arasyny üzdi. Wanyň hasabynda indi iki ýeňliş bilen 20 ýeňiş bar.
UFC 323 ýaryşynyň esasy söweşleriniň netijeleri:
- ·Pýotr Ýan emin agzalarynyň biragyzdan goldamagynda Merab Dwalişwilini ýeňdi.
- ·Joşua Wan tehniki nokaut (el şikesi) bilen Aleksandr Pantožany ýeňdi.
- ·Tasuro Taýra tehniki nokaut bilen Brendon Morenony ýeňdi – ikinji raund.
- ·Peýton Talbott emin agzalarynyň biragyzdan ses bermeginde Genri Sehudony ýeňdi.
- ·Ýan Blahowiç bilen Bogdan Guskowyň söweşi deňme-deňlikde tamamlandy.
