Hindistandan Sarwagýa Singh Kuşwaha üç ýaşynda öz adyny küşt dünýäsiniň taryhyna ýazmagy başardy. Bu ýaş wunderkind Halkara küşt federasiýasynyň (FIDE) resmi reýtingine giren dünýäde iň ýaş oýunçy boldy diýip, The Guardian neşiri habar berýär.
Rekord goýlan wagty Sarwagýanyň ýaşy 3 ýyl, 7 aý we 20 gündi. Ol geçen ýylyň noýabrynda rekord goýan (3 ýyl, 8 aý we 19 gün) watandaşy Aniş Sarkaryň üstünligini bir aýdan gowrak tapawut bilen täzeledi.
Resmi reýtinge girmek üçin küştçi şeýle reýtingi bar bolan, iň bolmanda, bir oýunçyny utmaly. Heniz Madhýa-Pradeş ştatyndaky çagalar bagyna gatnaýan Sarwagýa bu wezipeden üstünlikli baş çykardy. Ol ýurduň dürli ýerlerinde geçirilen ýaryşlarda reýtingli üç garşydaşyndan üstün çykdy.
Ýaş küştçi rapidde (çalt küşt) 1572 utuk gazandy. Ol entek lider bolmakdan uzakda – dissiplinada birinji orny 2824 utuk görkezijisi bilen norwegiýaly Magnus Karlsen eýeleýär. Häzirki dünýä çempiony Gukeş Dommaraju we tanymal Wişwanatan Anand ýaly grossmeýsterleri dünýä sowgat eden Hindistan üçin Sarwagýanyň peýda bolmagy ýene bir buýsanç çeşmesi boldy.
“Biziň üçin oglumyzyň FIDE reýtingi bilen dünýäde iň ýaş küştçi bolmagy uly buýsanç we hormat. Biz onuň grossmeýster bolmagyny arzuw edýäris” – diýip, oglanjygyň kakasy Siddhart Singh şatlygy bilen paýlaşdy.
