Häzirki zamanyň iň beýik binagärleriniň biri Frenk Geri 96 ýaşynda aradan çykdy. Binagärlik dekonstruktiwizminiň ussady 5-nji dekabrda uzak dowam etmedik keselden soň Los-Anjelesdäki öýünde ýogaldy diýip, The Guardian neşiri habar berýär.
Frenk Geri binagär Frenk Lloýd Raýtyň döwründen bäri iň tanymal amerikaly binagär hasaplanýardy. Geri Zaha Hadid we Rem Kolhas bilen bir hatarda XX we XXI asyrlaryň sepgidinde işjeň ösen dekonstruktiwizm ugrunyň esasyny goýujy boldy. Geri işde kompýuter dizaýnyny ilkinji ulanyp başlanlaryň biridi.
Frenk Geriniň iň belli işi 1997-nji ýylda Bilbaoda açylan Guggenhaým muzeýi hasaplanýar. Binagäriň beýleki möhüm taslamalarynyň arasynda Los-Anjelesdäki Uolt Disneý konsert zaly, Pragadaky «tans edýän» öý, Minneapolisdäki Frederik Weýsman muzeýi, şeýle-de Pariždäki Lui Witton Gaznasynyň binasy bar.
1989-njy ýylda Frenk Geri binagärlik ugrunda esasy baýrak bolan Pritsker baýragynyň eýesi boldy.
Binagäriň belli işleri
Bilbaodaky Guggenhaým muzeýi
Los-Anjelesdäki Uolt Disneý adyndaky konsert zaly
Pragadaky «tans edýän» öý
Minneapolisdäki Frederik R. Weýsman çeperçilik muzeýi
Pariždäki Lui Witton Gaznasynyň binasy
