ABŞ-nyň Prezidenti Donald Tramp Halkara futbol federasiýasy (FIFA) tarapyndan esaslandyrylan täze Parahatçylyk baýragynyň ilkinji eýesi boldy. Ak tamyň ýolbaşçysyna baýragy FIFA-nyň prezidenti Janni Infantino gowşurdy.
Gowşurylyş dabarasy Jon Kennedi adyndaky ýerine ýetirijilik sungaty merkezinde 2026-njy ýylyň dünýä çempionatynyň toparlaýyn tapgyrynyň bije çekilişigi wagtynda geçirildi.
Tramp bu baýragyň özi üçin durmuşynda uly hormat bolandygyny aýtdy.
Baýragyň eýesine barmaklarynyň ujy bilen Ýer şaryny saklap duran dört penje görnüşinde uly kubok gowşuryldy.
Baýragyň döredilendigi barada noýabrda, Infantino bilen Trampyň Maýamidäki Amerikan işewürlik forumynda çykyş eden güni belli boldy. FIFA-nyň saýtynda parahatçylyk baýragynyň «parahatçylyk üçin aýratyn we adatdan daşary işleri amala aşyran we şonuň bilen dünýädäki adamlary birleşdiren şahsyýetlere» berilýändigi aýdylýar. Şol bir wagtyň özünde, baýragy döretmek baradaky çözgüt guramanyň dolandyryjy edarasy bolan FIFA-nyň Geňeşi tassyklamazdan kabul edildi.
2026-njy ýylyň dünýä çempionaty 11-nji iýundan 19-njy iýul aralygynda üç ýurduň: ABŞ-nyň, Kanadanyň we Meksikanyň çäginde geçiriler. Ýaryşyň final oýny Nýu-Jersi ştatyndaky «Metlaýf-stediumda» bolar.
