Apple-iň interfeýs dizaýny boýunça wise-prezidenti Alan Daý 31-nji dekabrda Meta kompaniýasyna işe geçer. Bu barada Bloomberg agentligi habar berdi. Soňra maglumaty Apple-iň wekili tassyklady.
Meta-da Alan Daý dizaýn boýunça direktor wezipesini eýelär. Apple-iň ýolbaşçylaryna onuň gitjekdigi barada şu hepde habar berildi we Bloomberg-iň belleýşi ýaly, onuň işden gitjekdigi garaşylmadyk waka däldi.
Apple-iň täze baş interfeýs dizaýneri Stiwen Lemeý bolar. Apple-iň ýolbaşçysy Tim Kuk Lemeýiň «1999-njy ýyldan bäri Apple-iň ähli esasy interfeýslerini işläp taýýarlamakda möhüm rol oýnandygyny» belledi.
Alan Daý Apple-de 2006-njy ýylda işläp başlady, 2015-nji ýyldan bäri bolsa ulanyjy interfeýsiniň dizaýnerler toparyna ýolbaşçylyk etdi. Bloomberg-iň maglumatlaryna görä, 2019-njy ýylda Joni Aýwa gidenden soň, Daý kompaniýada has möhüm orny eýeläp başlady.
Reuters agentliginiň belleýşi ýaly, Daý Apple-iň Vision Pro, iPhone X we Apple Watch ýaly flagman önümleriniň daşky görnüşini döretmäge gatnaşdy. Şeýle-de, ol kompaniýanyň operasion ulgamlarynyň we programmalarynyň möhüm dizaýn üýtgeşmelerine jogap berdi.
