"Barselona" tomusky transfer penjiresi üçin ileri tutulýan oýunçylaryň sanawyny düzdi diýip, Mundo Deportivo habar berýär.
Neşiriň maglumatyna görä, toparyň baş tälimçisi Hans-Diter Flik sport direktory Deku we sport komitetiniň beýleki agzalary bilen bilelikde güýçlendirmek üçin esasy pozisiýalary – çep aýakly merkezi goragçyny, wingeri (ganat hüjümçini) we merkezi hüjümçini kesgitlediler.
Eger "Barselona" maliýe feýr-pleýiň düzgünlerini berjaý etmegi başarsa, goragçy transferi zerur bolan halatynda, 2026-njy ýylyň gyşynda amala aşyrylyp bilner. Bu pozisiýa göz öňünde tutulýan dalaşgärleriň arasynda Mark Gehi ("Kristal Pelas"), Gonsalu Inasiu ("Sporting"), Murilo ("Nottingem Forest"), Niko Şlotterbek ("Borussiýa” Dortmund) we Luis Benedetti ("Palmeýras") bar.
Merkezi hüjümçi hem ileri tutulýan pozisiýa bolup durýar, sebäbi Robert Lewandowskiniň şertnamasynyň möhleti tamamlanýar. Şeýle hem klub Hulian Alwaresi ("Atletiko"), Garri Keýni ("Bawariýa") we Erling Holandy ("Mançester Siti") göz öňünde tutýar.
Mundan başga-da, "Barselona" Rafinýanyň Saud Arabystanyna gitmeginiň mümkindigini göz öňünde tutup, flanglardaky ýerlerini güýçlendirmäge çalyşýar. Dalaşgärleriň arasynda Markus Raşford (“Mançester Ýunaýted”) hem bar, onuň satyn alma şerti €30 million diýlip habar berilýär, emma soňky karar onuň möwsümiň galan böleginde görkezjek oýnuna bagly bolar. Şeýle hem, klub "Milan" toparynyň portugaliýaly oýunçysy Rafaela Leaony göz öňünde tutýar.
Häzirki wagtda "Barselona" La Ligada birinji orny we Çempionlar Ligasynda bolsa 18-nji orny eýeleýär.