Angliýanyň Premýer-ligasynyň futbol klublary zähmet haklaryna çäk girizmek baradaky teklibi ret edip, häzirki girdejililik we durnuklylyk düzgünlerini (PSR) çalyşjak täze maliýe düzgünnamasyny tassyklady. Bu barada The Times gazeti habar berdi.
Çykdajylara çäk girizmek başlangyjy şu güýzde öňe sürüldi. Ol klublaryň geçen möwsümde liganyň iň pes netije görkezen toparynyň teleýaýlym hukuklaryny satmakdan gazanan girdejisiniň bäş essesinden köp harçlamagyny gadagan etmegi göz öňünde tutupdy. Çäklendirmeler oýunçylaryň zähmet haklaryna, bonuslara, tälimçiler ştaby üçin çykdajylara, agent töleglerine we transfer amortizasiýasyna täsir etmelidi.
Ses bermegiň netijesi boýunça bu başlangyjy ýigrimi klubdan diňe ýedisi goldady, on ikisi garşy çykdy, biri saklandy. Çözgüdi kabul etmek üçin goldaýan on dört ses gerekdi.
Şol bir wagtyň özünde, klublar täzelenen maliýe düzgünnamasyny ylalaşdy. Ol squad-cost ratio (SCR) ulgamyna esaslanýar we toparyň düzümi bilen baglanyşykly çykdajylaryň klubuň girdejisiniň 85%-inden ýokary bolmaly däldigini kesgitleýär. Islendik kiçi artykmaçlyk, 30%-e çenli, pul jerimesine getirer.
Eger çykdajylar girdejiniň 115%-inden geçse, klublara sport sanksiýalary bellener. Esasy jeza – ýaryş jedwelinde alty utuk aýyrmak. Şeýle-de, bellenilen çäkden artyk her 6,5 mln funt sterling üçin goşmaça bir utuk aýrylar.
