Uelsiň paýtagty Kardiff şäherindäki muzeýden bürünç asyrynyň altyn şaý-sepleri ogurlandy. Bu barada ýerli polisiýa salgylanyp, Telegraph gazeti habar berdi.
Gazetiň maglumatlaryna görä, bürünç asyrynyň birnäçe özboluşly predmetleri Keramatly Fagan galasynyň çägindäki Milli taryh muzeýiniň baş edarasyndaky witrinadan ogurlandy. Ýiten predmetleriň arasynda Pouis sebitinden orta bürünç asyrynyň dört altyn bilezigi we Gwined sebitinden monjuk hökmünde dakylýan altyndan ýarymaý şekilli bezeg önümi bar.
Mundan başga-da, polisiýa Karmartenşir sebitinden orta bürünç asyrynyň bäş altyn predmetini we Pouisden orta bürünç asyrynyň üç altyn predmetini gözleýär.
Hukuk goraýjylar derňew işleriniň dowamynda 45 ýaşly bir aýalyň tussag edilendigini, soňra goýberilendigini habar berdi.
Bellenilişi ýaly, Kardiffdäki muzeý 1948-nji ýyldan bäri işleýär.
