Braziliýanyň milli ýygyndysynyň düzüminde futbol boýunça üç gezek dünýä çempiony Pele 83 ýaşynyň içinde aradan çykdy. Bu barada onuň gyzy Kelli Nasimentu özüniň Instagram sahypasynda habar berdi. Muny TASS ýetirýär.
“Biz seni çäksiz söýýäris. Ýatan ýeriň ýagty bolsun” – diýlip, habarda aýdylýar. “Albert Eýnşteýn” klinikasynyň resmi býulleteninde ölümiň sebäbiniň “ýogyn içegäniň rak keseliniň otrisatel dinamikasy netijesinde organlaryň işlemegi bes etmeginiň bolandygy” bellenilýär.
2021-nji ýylyň sentýabr aýynda Pele ýogyn içegedäki çişi aýyrmak üçin operasiýa geçirdi. 2022-nji ýylyň noýabr aýynyň ahyrynda ol hassahana düşdi. 22-nji dekabrda lukmanlar Peläniň onkologiýa keseliniň otrisatel dinamikasyny başdan geçirýändigini habar berdiler.
Pele (hakyky ady – Edson Arantis du Nasimentu) Braziliýanyň “Santos” we “Nýu-Ýork Kosmos” amerikan klubunyň düzüminde 1956-njy ýyldan 1977-nji ýyllar aralygynda professional derejede çykyş etdi, “Santos” bilen bilelikde Braziliýanyň Kubogynyň bäş gezek eýesi boldy, iki gezek Libertadores kubogyny we Kontinentara kubogyny gazandy. Braziliýanyň milli ýygyndysynyň düzüminde Pele oýunçy hökmünde ýeke-täk üç gezek dünýä çempiony boldy (1958, 1962, 1970). Ol karýerasy üçin 1 279 goluň awtory hökmünde Ginnesiň rekordlar kitabyna girizildi.
Şeýle-de, 1999-njy ýylda Halkara Olimpiýa Komiteti Peläni hiç wagt Olimpiýa oýunlaryna gatnaşmandygyna garamazdan ýüzýyllygyň iň gowy türgeni diýip ykrar etdi. Ol Latyn Amerikasynyň territoriýasynda Olimpiýa alawyny göteren ilkinji adam boldy. Bu 2004-nji ýylda, Afinadaky Oýunlaryň öňüsyrasynda bolup geçdi.
