ABŞ-nyň Prezidenti Donald Tramp 2026-njy ýylyň futbol boýunça dünýä çempionatyna gatnaşmagy meýilleşdirýän daşary ýurtly janköýerler üçin wiza almak işiniň ýeňilleşdirilýändigini aýtdy.
Amerikan lideriniň sözlerine görä, syýahatçylyk wizasyny almagyň möhleti ep-esli azaldyldy. Ozal bu proses bir ýyla çenli wagt alyp bilýärdi, indi bolsa garaşmagyň möhleti 60 gün ýa-da ondan hem az bolup biler. Dünýä ýurtlarynyň, takmynan, 80%-iniň ýaşaýjylary üçin tutuş proses iki aýda tamamlanar.
“Bize dünýä çempionatyna goşulmak isleýänlere häzirden arza tabşyrmagy berk maslahat berýärin” – diýip, Tramp 17-nji noýabrda Ak tamda geçirilen iş toparynyň ýygnagynda aýtdy.
ABŞ-nyň Döwlet sekretary Marko Rubio petek satyn almagyň awtomatik taýdan wiza aljakdygyňy aňlatmaýandygyny, ýöne çaltlaşdyrylan tertipde söhbetdeşlik üçin wagt almaga mümkinçilik berýändigini aýtdy. Şol bir wagtyň özünde, arza tabşyryjylar beýleki syýahatçylar bilen deň düzgünler boýunça barlanar.
Tramp Döwlet sekretarynyň we Içeri howpsuzlyk ministrliginden hünärmenleriň ýolbaşçylygyndaky toparyň düýpli barlag işlerini ýola goýandygyny we şondan soň janköýerleriň ýurda päsgelçiliksiz girip biljekdigini belledi.
2026-njy ýylyň futbol boýunça dünýä çempionaty ABŞ-da, Kanadada we Meksikada geçiriler. Trampyň aýtmagyna görä, ýaryş eýýäm rekord petek satuwyny görkezýär.
