Britaniýaly aýdymçy Dua Lipa özüniň Dua atly täze ideg kosmetika liniýasyny çykardy diýip, Hypebae portaly habar berýär.
Bu kolleksiýa kosmetika brendi Augustinus Bader Science bilen hyzmatdaşlykda döredildi. Oňa üç sany serişde girýär: derini arassalaýjy krem — Balancing Cream Cleanser, deri öýjüklerini täzeleýji krem — Renewal Cream we derini ýalpyldadýan toplum — Supercharged Glow Complex.
Kompaniýanyň bellemegine görä, bu serişdeleriň formulasy TFC5 tehnologiýasyna esaslanýar. Ol deriniň tebigy gorag ukybyny güýçlendirýär we onuň çeýeligini saklamaga kömek edýär, ýagny ýygyrdyň öňüni alýar.
Aýdymçynyň sözlerine görä, ol täze toplumy gündelik ulanmak üçin ýönekeý we täsirli önüm hökmünde döretmek isläpdir.
«Men bu deri ideg liniýasyny gündelik ulanýan, arassa, täsirli we amatly serişde bolmagy üçin döretdim. TFC5 tehnologiýasy bilen Dua toplumy deri üçin zerur bolan aýratyn talaplara laýyk bolup, wagt geçdikçe onuň saglygyny we çeýeligini gowulandyrýar» diýip, Dua Lipa aýtdy.
Bu serişdeleriň bahasy 40 bilen 80 dollar aralygynda. Olar brendiň resmi web sahypasynda satylýar. Kolleksiýa Augustinus Bader brendiniň müşderilerinden tapawutlylykda, esasan, 18–35 ýaş aralygyndaky alyjylara niýetlenendir.
