Madridiň “Atletiko” futbol kluby paýnamalaryň gözegçilik bukjasynyň Apollo Sports Capital (ASC) maýa goýum kompaniýasyna satylandygyny habar berdi.
Şertnamanyň çäklerinde Migel Anhel Hil we Enrike Sereso baş direktor we prezident hökmünde öz orunlaryny, şeýle-de paýdar statusyny saklap galar. Soňky ýigrimi ýylda olaryň ýolbaşçylygynda “Atletiko” Ýewropanyň iň üstünlikli we belli klublarynyň biri boldy.
Paýdarlar klubuň uzak möhletleýin meýilnamalaryny goldamak üçin serişde maýa goýmagy, şol sanda “Atletiko” toparlaryna we uly infrastruktura taslamalaryna maýa goýmagy meýilleşdirýär.
Klubuň resmi saýtynda täze hyzmatdaşyň “Atletikonyň” taryhyny, däp-dessurlaryny, özboluşlylygyny we onuň janköýerlerini hormatlaýandygy, şol bir wagtyň özünde-de ösüşi we bäsdeşlige ukyplylygy saklamak üçin goşmaça serişdeleri berýändigi bellenilýär.
Ispaniýanyň Primerinde 12 tapgyrdan soň “Atletiko” 25 utuk bilen dördünji orny eýeleýär. Çempionlar ligasynda topar dört oýunda alty utuk gazandy.
