Neuralink-iň hassasy Bred Smit görmekden mahrum bolmandy, ýöne amiotrofik gapdal sklerozy sebäpli ol kellesini hereket etdirip bilenokdy. Ýöne ol beýni implantyny ulanmagyň täze usulyny tapdy. Indi ol Neuralink-i ýörite berkidilen web-kamerany dolandyrmak üçin ulanýar. Bu hem, onuň aýtmagyna görä, oňa “goşmaça iki göz” berdi diýip, TechSpot habar berýär.
Ozal Smit daş-töwerek bilen Eyegaze enjamynyň – gözüň hereketini yzarlap, ekranda harplary saýlamaga kömek edýän ulgamyň kömegi bilen aragatnaşyk saklaýardy. Ýöne ulgam diňe gowy ýagtylygy talap edýärdi. 2024-nji ýylyň noýabrynda Smit Neuralink implantyny alan üçünji adam we amiotrofik gapdal sklerozly birinji hassa boldy.
Türgenleşiklerden soň Smit pikiriň güýji bilen kompýuterde kursory dolandyryp başlady. Soňra ol Neuralink-i motorlaşdyrylan Insta360 Link 2 4K web-kamerasyna birikdirdi. Bu hem pikiriň güýji bilen kamerany öwürmäge, egmäge we şekili ýakynlaşdyrmaga mümkinçilik berdi. Netijede, kamera kelläň bilen hereket edeniň ýaly işleýär. Kamera buýruklaryň çalt we takyk ýerine ýetirilmegi üçin ýörite beýniniň iberýän signallaryna görä sazlandy.
Indi Smit öýde çagalaryna seredip, wideo habarlary ýazyp, açyk howada maşgala dabaralaryna gatnaşyp bilýär. Neýrointerfeýs bilen motorlaşdyrylan kameranyň utgaşdyrylmagy oňa hakyky wagtda diýen ýaly daşky dünýä bilen aragatnaşyk saklamaga mümkinçilik berdi.
