“Mançester Sitiniň” baş tälimçisi Hosep Gwardiola halypa hökmünde 1000-nji oýnuny geçirer. Angliýanyň Premýer-ligasynyň 11-nji tapgyrynyň çäklerinde “Liwerpula” garşy oýun ispaniýaly hünärmen üçin şanly waka bolar.
“Eger men şeýle ýubileý üçin garşydaşy özüm saýlap bilen bolsam, “Liwerpul” iň gowusy bolardy. Men eýýäm köpden bäri bu ýurtda. Elbetde, “Barselona” meniň durmuşymyň möhüm bölegi boldy. Men ol ýerde topy alyp berýän oglan, futbolçy, tälimçi boldum. “Bawariýa” hem durmuşymda üýtgeşik tapgyr boldy. Ýöne “Liwerpul” – aýratynam, Ýurgen Kloppyň işlän döwürleri – bu ýurtda biziň esasy garşydaşymyz. Ondan gowusy bolubam bilmez. Ykbal, dünýäniň erki şeýle. Men janköýerlerimiz stadionda meniň ýubileýimi bellemäge geler we biz bilelikde güýçli garşydaşy utup bileris diýip umyt edýärin” – diýip, Gwardiola toparyň resmi saýty üçin interwýuda aýtdy.
Dokuz tapgyrdan soň “Mançester Siti” 19 utuk bilen APL-iň ýaryş jedwelinde ikinji, “Liwerpul” 18 utuk bilen üçünji orunda ýerleşýär.
Gwardiolanyň tälimçi hökmünde karýerasy 2007-nji ýylda “Barselona B” toparynda başlady. Şondan bäri ol “Barselonanyň” esasy toparyna, Mýunheniň “Bawariýasyna” we Angliýanyň “Mançester Siti” klubuna ýolbaşçylyk etdi. Onuň ýolbaşçylygyndaky 999 oýunda toparlar ähli ýaryşlarda 715 ýeňiş gazandy we 128 ýeňlişe sezewar boldy, 12 gezek milli çempionaty utdy we üç gezek UEFA-nyň Çempionlar ligasynyň ýeňijileri boldy.
54 ýaşly hünärmeniň 1000-nji oýny ýekşenbe güni, 9-njy noýabrda Mançesterdäki “Etihad Stediumda” geçiriler. Duşuşyk Aşgabat wagty bilen 21:30-da başlar.
