Toyota Supra sportkarynyň önümçiliginiň 2026-njy ýylyň mart aýynda bes ediljekdigini resmi taýdan habar berdi. Şonuň üçin 2026-njy ýylyň modeli Supra-nyň soňky nesli hökmünde bazara çykar.
Kompaniýa müşderilerine goldawlary üçin minnetdarlyk bildirip, Supra satyn almagy meýilleşdirýänlere dilerlere ýüz tutup alternatiw modeller boýunça maslahat almaga çagyryş etdi.
Supra-nyň bäşinji nesli 21 ýyl arakesmeden soň 2019-njy ýylda Detroýt awtosergisinde täzeden tanyşdyrylyp, BMW bilen bilelikde Z4 modeli bilen umumy platformada işlenip düzülipdi. Ilkinji wersiýalary 3,0 litrlik B58 alty silindrli turbo hereketlendiriji we 8 tizlikli awtomat geçiriş bilen çykaryldy. Soň bolsa 2,0 litrlik B48 dört silindrli wariant we alty silindrli hereketlendiriji üçin 6 tizlikli mehaniki geçiriş hem goşuldy.
ABŞ bazary üçin iň soňky ýörite seriýa — 2026 Supra MkV Final Edition — 382 at güýjüni we 524 Nm torky öndürýän B58 hereketlendiriji bilen üpjün ediler. Ol 0-dan 96 km/s tizlige 3,9 sekuntda ýetýär. Bu wersiýanyň bahasy 69 745 dollar bolar.
