Intel korporasiýasy täze baş direktor Lip-Bu Tanyň ýolbaşçylygynda ştaty optimizirlemek maksatnamasynyň çäklerinde soňky iki ýylyň dowamynda takmynan 35 500 işgärini işden boşatdy. Bu barada Tom’s Hardware portaly habar berýär.
Gymmatly kagyzlar we biržalar boýunça komissiýa bilen paýlaşylan soňky hasabata laýyklykda, diňe Tanyň ýolbaşçylygynyň ilkinji üç aýynda 20 500 adam işden çykaryldy. Öňki ýolbaşçylaryň döwründe geçirilen işden çykarmalar bilen birlikde, umumy sany 35 500 adama ýetdi.
2025-nji ýylyň sentýabr aýynyň ahyrynda Intel-iň işgärleriniň sany 88 400 adam boldy. Işden boşatmalaryň esasy bölegi ikinji çärýekde amala aşyryldy we üýtgedip gurma prosesine 1 milliard dollardan gowrak çykdajy gidýär.
Ilkibaşda çäreler orta basgançak ýolbaşçylary azaltmaga gönükdirilen bolsa-da, netijede işden boşatmalar müňlerçe inženeri we tehnikleri hem öz içine aldy. Mysal üçin, Oregondaky bölümleriň arasynda işden çykarylanlaryň diňe 8%-i “menejer” wezipesinde işleýänlerdi.
Şeýle hem işgär sanynyň azalmagy bilen, kompaniýanyň gözleg we tejribe taslamalary üçin býujeti geçen ýyl bilen deňeşdirilende 800 million dollardan gowrak kemeldildi. Şeýle-de bolsa, girdejiniň ýokarlanmagy saklanyp galdy.
Intel-iň maliýe müdiri Dewid Zinsneriň sözlerine görä, 2026-njy ýylda kompaniýanyň amal çykdajylary 16 milliard dollar töwereginde saklanar. Maliýe serişdeleri strategik ähmiýetli ugurlara — Intel 18A we 14A tehnologiýa proseslerine, AI önümlerine we ösüşli gaplama tehnologiýalaryna gönükdiriler.
