1000-den gowrak jemgyýetçilik işgäri, şol sanda oýlap tapyjy, Apple-iň egindeş esaslandyryjysy Stiw Woznýak, “EA-nyň atalary” Jeffri Hinton we Ýoşua Benjio super EA-ny döretmäge garşy çykyş etdi. Olar şeýle tehnologiýanyň howpsuzdygyna göz ýetirilýänçä, şeýle ulgamlary döretmegi bes etmäge çagyryş bilen açyk hata gol çekdi.
Gol çekenleriň arasynda Virgin Group-yň esaslandyryjysy Riçard Brenson, syýasatçylar we harby hünärmenler, meşhur aktýorlar, sazandalar, şeýle-de Sasseks gersogy we gersog aýaly şazada Garri we Megan bar. Hat EA howpsuzlygy boýunça topar Future of Life Institute (FLI) tarapyndan taýýarlandy. Onda EA-nyň saglygy we durmuşyň hilini gowulandyrmaga ukyplydygy, ýöne kompaniýalaryň ýakyn ýyllarda döretmegi meýilleşdirýän super aňynyň ähli kognitiw meseleler boýunça adamlardan öňe geçip, çynlakaý töwekgelçilikleri döredip biljekdigi bellenilýär.
Aktiwistler bolup biljek howplar barada duýdurýar: iş orunlarynyň ýitmegi, hukuk we azatlyk çäklendirmesi, milli howpsuzlyk üçin zyýan we hatda adamzady doly ýok etmek howpy.
Geçen hepde FLI emeli aňy gözegçilik astyna almak çagyryşlaryndan soň OpenAI-iň kazyýete çagyryş hatyny iberendigini habar berdi. OpenAI-iň ýolbaşçysy Sem Altman super EA-nyň 2030-njy ýyla çenli peýda bolup biljekdigini we häzirki ykdysady wezipeleriň 40%-iniň EA-a geçiriljekdigini çaklaýar. Meta hem ýokary aňy ösdürýär: onuň baş direktory Mark Sukerberg taslamanyň durmuşa geçirilmäge taýýardygyny aýtdy.
Şuňa meňzeş öňki hatlar, mysal üçin, Ilon Mask tarapyndan 2023-nji ýylda gol çekilen hat hiç hili netije bermändi.
