“Barselona” futbol kluby taksi gözlemek we sargyt etmek boýunça Uber hyzmaty bilen hyzmatdaşlygyň başlandygyny habar berdi. Şertnama 2027-nji ýyla çenli hereket eder we Mundo Deportivo neşiriniň maglumatlaryna görä, kluba ýylda, takmynan, 1 mln ýewro getirer.
“Barselonanyň” metbugat gullugynyň habar berşi ýaly, hyzmatdaşlyk oýun günleri janköýerleriň hereketini aňsatlaşdyrmaga we “Kamp Nou” stadionynyň töwereginde ulag gatnawyny tertipleşdirmäge gönükdirilýär.
Hyzmatdaşlygyň çäklerinde klub we Uber katalon klubunyň reňkinde 30 sany CUPRA Tavascan elektromobilini çykarar. Bu ulaglary Uber goşundysy arkaly çagyryp bolar. Täzelenen “Kamp Nou” açylýança, kompaniýa ýolagçylary düşürmek we mündürmek üçin ýörite zolaklary taýýarlar.
“Barselona diňe bir janköýerleri däl, eýsem tutuş şäheri ruhlandyrýar. Biz janköýerlere söýgüli toparynyň reňkleri bilen bezelen elektromobilde gezelenç ýarar diýip umyt edýäris” – diýip, Ispaniýada we Portugaliýada Uber-iň baş menejeri Felipe Fernandes Aramburu belledi.
Mundan başga-da, Uber bilen Uber Eats-iň mahabaty stadionyň çäginde we onuň töwereginde – bannerlerde, elektron diwarlarda we klubuň resmi ulaglarynda peýda bolar. Hyzmatdaş oýunçylaryň suratlaryny ulanmak we “Kamp Nouda” çäre geçirmek hukugyny-da gazanar.
