Ýekşenbe güni agşam La Ligada güýzüň esasy oýny – Madridiň “Realy” bilen “Barselonanyň” arasynda nobatdaky “El-Klasiko” bolar. Toparlar diňe bir üç utuk gazanmak däl, eýsem biri-birinden ýene bir basgançak ýokary bolmak ugrunda bäsleşer.
Görkezijilere seretsek:
Soňky 5 resmi oýunda tereziniň agyr tarapy “Barselonada” – umumy gol tapawudy 18:10. Kataloniýalylar soňky 4 oýunda ýeňiş gazandy.
- ·21.04.2024 – “Real” 3:2 “Barselona” (La Liga)
- ·26.10.2024 – “Real” 0:4 “Barselona” (La Liga)
- ·12.01.2025 – “Real” 2:5 “Barselona” (Ispaniýanyň Superkubogynyň finaly)
- ·26.04.2025 – “Barselona” 3:2 (goşmaça wagtda) “Real” (Ispaniýanyň Kubogynyň finaly)
- ·11.05.2025 – “Barselona” 4:3 “Real” (La Liga)
Toparlar jemi 261 resmi oýunda duşuşdy (La Ligada, Ispaniýanyň Kubogynda, Çempionlar ligasynda, Superkubokda we beýleki ýaryşlarda). Häzirki wagtda sähel artykmaçlyk “Realyň” tarapynda bolup, onuň 105 ýeňşi “Barselonanyň” 104 ýeňşine garşy durýar, deňme-deňlik – 52. Gol boýunça-da tapawut o diýen uly däl – madridliler 440 gol, “Barsa” 435 gol geçirdi.
Toparlaryň düzüm ýagdaýy:
“Realyň” habarlary gowy: Oýna Trent Aleksander-Arnold, Dani Karwahal, Din Hýoýsen we Dani Sebalýos gaýdyp geldi – hemmesi doly türgenleşige gatnaşdy.
Antonio Rýudiger we Dawid Alaba dikelmegini dowam edýär, Ferlan Mendi bolsa indi aýaga galdy. Toparyň galan ähli oýunçylary hatarda. Habi Alonso üçin bu baş tälimçi wezipesinde ilkinji “klasiko” bolar.
“Barselonanyň” ýagdaýy welin, öwerlikli däl. Onuň ýitgisi toparyň tälimçisi Hand-Diter Flikden başlaýar. Ol geçenki oýunda gyzyl duýduryş alandygy üçin, bu gezek oýna münberden tomaşa etmeli boldy.
Şikes sebäpli toparyň köp oýunçylary – winger Rafinýa, hüjümçi Robert Lewandowski, ýarymgoragçylar Dani Olmo we Gawi hem oýnamaz. Şeýle-de, derwezebanlar Žoan Garsiýa bilen Mark-Andre ter Ştegen hem oýna gatnaşmaz. Klubda bir gowy habar Ferran Torresiň doly dikelmegi boldy.
Häzirki wagtda ýaryş jedwelinde 24 utuk bilen “Real” birinji orny eýeleýär. “Barselona” 22 utuk bilen ikinji ýerde.
Futbol janköýerleri oýna 26-njy oktýabrda Aşgabat wagty bilen 20:15-de tomaşa edip biler.
