Türkmenistanyň sport ulgamynyň wekilleri 20-21-nji oktýabrda Mongoliýanyň paýtagty Ulan-Bator şäherinde geçirilen Merkezi Aziýa ýurtlarynyň talyplar sporty boýunça guramalarynyň ýolbaşçylarynyň we wekilleriniň gatnaşmagynda halkara okuw maslahatyna gatnaşdylar.
Türkmen döwlet bedenterbiýe we sport institutynyň saýtynda habar berlişi ýaly, «Ýokary bilim ulgamynda saglygy, abadançylygy we sporty ösdürmek» atly halkara okuw maslahatyna Türkmenistanyň Milli talyplar sport federasiýasynyň baş kätibi, Türkmen döwlet bedenterbiýe we sport institutynyň sportuň başa-baş tutluşyk kafedrasynyň uly mugallymy Serdar Gurdow wekilçilik etdi. Maslahaty Aziýa yklymyndaky talyplar sport federasiýasy, Halkara talyplar sporty federasiýasy we Mongoliýanyň talyplar sporty federasiýasy bilelikde guradylar.
Maslahatyň dowamynda Merkezi Aziýa ýurtlarynda talyplar sportunyň ösüşi, talyplaryň bedenterbiýe taýýarlygy, sport çäreleriniň utgaşdyrylmagy, şeýle hem sebitiň türgenleriniň yklym we dünýä derejesindäki ýaryşlara gatnaşygyny giňeltmek ýaly meseleler ara alnyp maslahatlaşyldy. Oňa şeýle hem Gazagystan, Özbegistan, Gyrgyzystan we Täjigistan ýaly ýurtlaryň wekilleri gatnaşdy.
Türkmenistanyň Milli talyplar sport federasiýasy 1995-nji ýyldan bäri Halkara talyplar sporty federasiýasynyň (FISU), 2004-nji ýyldan bäri bolsa Aziýanyň talyplar sporty federasiýasynyň (AUSF) agzasy bolup durýar. 2024-nji ýylda bolsa Bedenterbiýe we sport uniwersitetleriniň halkara birleşiginiň çözgüdi bilen, Türkmen döwlet bedenterbiýe we sport instituty abraýly halkara birleşigiň agzalygyna resmi taýdan kabul edildi.
