2026-njy ýyldan başlap Halkara tennis federasiýasy (International Tennis Federation, ITF) täze — World Tennis — atlandyrylar diýip, guramanyň metbugat gullugy habar berýär.
Adyny üýtgetmek baradaky karary ITF-iň düzümine girýän milli tennis birleşikleriniň köpüsi goldady. “World Tennis” ady gyzyklanýan taraplar bilen birnäçe wagt dowam eden gözlegleriň we maslahatlaşmalaryň netijesinde saýlanyldy. Guramanyň bellemegine görä, täze brend “tennise ýolbaşçylyk edýän halkara guramanyň we bu sporty gorap çykyş edýän birleşigiň wezipesini has doly açyp görkezýär”.
Halkara tennis federasiýasy 1913-nji ýylda Parižde Halkara laun-tennis federasiýasy ady bilen döredilipdi, 1977-nji ýylda bolsa häzirki adyny aldy. Häzirki wagtda federasiýanyň düzümine 213 milli birleşik girýär.
