Beýik Britaniýada üç müň töweregi ýaşaýjy Amerikanyň “Johnson & Johnson” kompaniýasynyň üstünden kazyýete arza berdi. Şikaýatçylar kompaniýanyň düzüminde rak keselini döredýän asbest maddasynyň bolmagynyň mümkindigini bilibem, talk prisypkasyny birnäçe ýyllap satandygyny öňe sürýärler diýip, BBC habar berýär.
Arzaçylaryň bähbitlerini araýan KP Law hukuk kompaniýasynyň wekilleri “Johnson & Johnson-nyň" asbestiň bardygyny 1960-njy ýyllardan bäri bilýändigini, ýöne müşderileri bu barada duýdurmandygyny aýdýarlar. Kompaniýanyň önümleri 2022-nji ýyla çenli Beýik Britaniýada satuwda bolupdyr.
Şikaýatçylaryň sözlerine görä, prisypkany ulanandan soň olaryň käbir garyndaşlaryna ýumurtgalyklaryň raky, mezotelioma we peritoneal rak ýaly keseller kesgitlenipdir. Käbir ýagdaýlar hassalaryň ölümi bilen gutarypdyr.
Bu Beýik Britaniýada şu mazmunda gozgalan ilkinji işdir. “Johnson & Johnson” ozal hem ABŞ-da müňlerçe meňzeş kazyýet işleri bilen ýüzbe-ýüz bolup, 2020-nji ýylda ol ýerde prisypkany satmagy togtadypdy.
2024-nji ýylyň maý aýynda kompaniýa takmynan 60 müň müşderiniň arzalaryny çözmek we 6,475 milliard dollar öweztöleg tölemek teklibini hödürläpdi. Şol bir wagtda “Johnson & Johnson” önümlerinde kanserogen maddalaryň bardygyny inkär etmegini dowam etdirýär.
Oktýabr aýynda Los-Anjelesiň kazyýeti mezotelioma sebäpli aradan çykan aýalyň maşgalasyna kompaniýanyň 966 million dollar tölemelidigi baradaky karary çykardy. Kazyýet keseliň düzüminde asbest bolan talkyň ulanmagy bilen baglanyşykly bolandygyny tassyklady.
