“Mýellbýu” futbol kluby taryhda ilkinji gezek Şwesiýanyň çempiony boldy. Topar 27-nji tapgyryň “Gýoteborg” bilen oýnunda 2:0 hasabynda utup, 66 utuk gazandy we ýakyn bäsdeşi bolan Stokgolmyň “Hammarbýu” klubundan 11 utuk öňe geçdi. Indi “Hammarbýu” galan ähli oýunlarda utsa-da, lideriň yzyndan ýetip bilmeýär.
“Mýellbýu” kluby 1939-njy ýylda döredildi. Geçen möwsümde topar bäşinji orny eýeledi we bu şol wagt klubuň taryhynda iň gowy netije bolupdy. 2023-nji ýylda “Mýellbýu” Şwesiýanyň Kubogynyň finalyna çykdy, ýöne “Hekkenden” 1:4 hasabynda utuldy.
“Mýellbýu” Hallewikde ýerleşýär, bu ýerde 2023-nji ýyla çenli ýagdaýa görä, 1,5 müň töweregi adam ýaşaýar. Klubuň elita diwizionynyň arasynda iň pes býujeti bar, öý stadiony bolsa bary-ýogy 6,7 müň tomaşaça niýetlenýär.
Baş tälimçi 59 ýaşly Anders Torstensson bolup, ol topara 2023-nji ýyldan bäri ýolbaşçylyk edýär. Mundan öň ol mekdep müdiri bolup işledi.
Häzirki möwsümde “Mýellbýu” 27 oýunda diňe bir gezek utulyp, 20 ýeňiş gazandy we alty gezek deňme-deň oýnady. Topar yzygider 19 oýun bäri utulman gelýär, ýeke-täk ýeňliş 11-nji maýda “AIK” kluby bilen oýunda boldy.
