Mercedes-Benz häzirki zaman tehnologiýalaryny nusgawy bezeg elementleri bilen sazlaşdyrýan täze konseptual kupesini — Vision Iconic modelini görkezdi. Bu ulag synag platformasy bolmak bilen bir hatarda brendiň taryhy awtoulaglaryna hormat hökmünde hem döredildi.
Vision Iconic elektrik güýç gurluşy bilen enjamlaşdyrylan, onuň kuzow panelleri bolsa Gün şöhlesinden energiýa öndürip bilýän fotoelektrik modullary bilen örtülendir. Işläp düzüjileriň maglumatlaryna görä, laýyk şertlerde bu ulgam ýylda zarýadsyz 12 000 kilometre çenli ýol geçmäge mümkinçilik berýär.
Daşky görnüşi boýunça konsept 1930-njy ýyllaryň awtoulaglaryny ýada salýar: uzyn kapot, togalak yzky bölek we üç şöhleli ýyldyz bilen yşyklandyrylan uly, dik radiator gözenegi bar. Mercedes-Benz-iň baş dizaýneri Gorden Wagener bu modeli “hereketdäki heýkel” diýip atlandyrdy.
Ulag dolandyrylýan yzky tekerli we “sim arkaly” rul ulgamly şasside gurlupdyr. Elektrikli kupede şäherde sürüjisiz hereket etmäge hem-de awtoulagy awtomatiki duralga goýmagyň mümkinçiliklerini berýän ikinji derejeli awtonom ulgamlar toplumy bar. Geljekde kompaniýa awtomagistrallarda doly özbaşdak sürmek üçin dördünji derejeli awtonom tehnologiýalary ornaşdyrmagy meýilleşdirýär.
Salony ýokary derejede bezelen — deri, mahmal we agaç elementleri bilen utgaşdyrylyp, käbir ýerleri sadap reňkli bezeg bilen bezelipdir. Merkezi böleginde bolsa aýnadan we metaldan ýasalan, gurallar paneliniň hem-de displeýiň funksiýalaryny birleşdirýän Zeppelin dolandyryş paneli ýerleşýär (şeýle at 1930-njy ýyllarda käbir Maybach modellerinde-de ulanylypdy).
Vision Iconic-iň önümçilige çykarylmagy barada kompaniýa entek resmi maglumat bermedi.
