“Barselona” futbol kluby öz resmi saýtynda dünýäde iň uly aýdym-saz platformalarynyň biri bolan Spotify bilen täze şertnama baglaşandygyny habar berdi. Taraplar hyzmatdaşlygy 2030-njy ýyla çenli uzaltdy, ýöne stadionyň ady üçin hukuk 2034-nji ýyla çenli Spotify-a degişli bolar.
“Barselona” we Spotify bütin dünýäde ýüzlerçe million muşdagy bolan meşhur brendler. Bu hyzmatdaşlyk olara strategiki bazarlarda ornuny giňeltmäge we tagallalary birleşdirip, täze auditoriýany çekmäge we global mümkinçiliklerini berkitmäge mümkinçilik berýär.
2022-nji ýylda “Barselona” FK bilen Spotify hyzmatdaşlyk edip başlany bäri janköýerler we sazandalar üçin köp ýatdan çykmajak pursatlar we wakalar döredildi. Olar sport hemaýatkärliginiň çäginden çykyp, futbol bilen aýdym-sazy baglanyşdyryp bolýandygyny bütin dünýä görkezdi” – diýlip, beýanda aýdylýar.
Žurnalist Reşad Rahmanyň maglumatlaryna görä, täze şertnamanyň çäklerinde “Barselona” Spotify logotipiniň oýun köýnekçelerinde ýerleşdirilendigi üçin ýylda 65 mln ýewro we türgenleşik eşigindäki nyşan üçin ýene 10 mln ýewro alar.
“Kamp Nou” stadionyna at bermegiň bahasy entek belli däl, çünki topar wagtlaýyn başga meýdançalarda oýnaýar. Klub täzelenen stadiona gaýdyp gelenden soň, munuň ýylda azyndan 20 mln ýewro getirip biljekdigi habar berilýär.
Häzirki möwsümde “Barselona” Ispaniýanyň çempionatynda ikinji orny eýeleýär, ol Madridiň “Realyndan” iki utuk yzda barýar.
