Ýaponiýanyň Yamaha kompaniýasy üç tigirli Tricera ulagynyň täzelenen görnüşini hödürledi. Täze modeliň esasy aýratynlygy — üç tigriniň ählisiniň hem dolandyrylmagyny üpjün edýän ulgamdyr. Prototip şu aýyň ahyrynda Tokioda geçiriljek Japan Mobility Show sergisinde ilkinji gezek görkeziler.
Tricera-nyň ilkinji nusgasy 2023-nji ýylda tanyşdyrylypdy, ýöne şol wagtdan bäri model ep-esli kämilleşdirildi. Indi ulagda amatly oturgyçlar, gorag dugalary, kiçi yza seredilýän aýnalar we goşa alyn aýnalary bar. Awtoulagyň dizaýny häzirki zaman Yamaha motosiklleri bilen meňzeş — tegelek faralar we kese ýerleşýän gündizki yşyklar ony aýratyn edýär.
Täzelenen prototip indi adaty ýollarda hereket etmäge taýyn ulag görnüşine eýe bolup, daşyndan önümçilik modeline çalym edýär. Şeýle-de bolsa, Yamaha häzirki wagtda Tricera-nyň önümçilige goýberiljekdigini entek tassyklamandyr. Trisikl doly elektriklidir, emma kompaniýa onuň güýç ulgamynyň tehniki aýratynlyklaryny häzirlikçe mälim etmeýär.
Yamaha bu sergä Tricera-dan başga-da birnäçe täze işläp taýýarlamalaryny getirer:
- egrelmäge we şekilini üýtgetmäge ukyply iki tigirli Motoroid konsepti,
- doly elektrikli Proto BEV baýky,
- şeýle hem maýyplar üçin niýetlenen ýörite arabalary görkeziler.
