Hyundai kompaniýasy heläkçilik ýüze çykanda ýangyn döremek howpunyň bolmagy sebäpli 135 386 sany Santa Fe krossowerini — şol sanda täze modelleri hem — yzyna çagyrýandygyny mälim etdi.
ABŞ-nyň Ýol hereketiniň howpsuzlygy dolandyryş Milli gullugynyň (NHTSA) habaryna görä, käbir ulaglarda starter nädogry gurnalan bolmagy mümkin.
Ýol heläkçiligi ýagdaýlarynda starteriň klemmasy hereketlendirijiniň bölüminiň beýleki metal böleklerine galtaşyp, gysga utgaşma döredip we ýangynyň döremegine sebäp bolup biler. Bu ýagdaý ýolagçylaryň şikes almak töwekgelçiligini ýokarlandyrýar.
Bu mesele barada ilkinji gezek düzgünleşdiriji tarapyndan Santa Fe modeliniň howpsuzlyk synagy wagtynda habar berildi. Soňra Hyundai öz içki derňewini geçirip, goşmaça synaglaryň netijesinde kemçiligiň ulaglaryň takmynan 1%-inde ýüze çykýandygyny we dogry gurnalan starteriň howp döredmeýändigini anyklady. Kompaniýanyň berýän maglumatlaryna görä, ýangyn bilen bagly wakalar entek hasaba alynmady.
Yza çagyryş, esasan, Hyundai-yň Alabama zawodynda öndürilen, 2,5 litrlik turbo hereketlendirijili 2024 we 2025-nji ýylyň Santa Fe modellerine degişli.
Mundan öň, sentýabr aýynyň ortalarynda, kompaniýa Palisade krossowerleriniň ýarym milliondan gowragyny howpsuzlyk kemerlerindäki näsazlyk sebäpli yzyna çagyrandygyny hem habar beripdi.
