Telegram messenjeri uly täzelenme çykardy. Indi toparlaýyn jaň wagty beýleki gatnaşyjylar bilen ýazyşyp bolýar – habarlar we emojiler, söhbeti bölmezden, gysga wagtlyk her kimiň ekranynda görünýär. Eger tekstsiz bir emoji iberilse, ol hereket edýän görnüşe öwrülýär. Bu aýratynlyk 1 müň töweregi adamyň gatnaşmagynda geçirilýän toparlaýyn jaň wagty işleýär.
iOS 26 üçin wersiýada Liquid Glass (suwuk aýna) stilinde dizaýn peýda boldy. Nawigasiýanyň aşaky paneli, klawiatura, stiker paneli we menýu ýaly interfeýs elementleri ýarym dury we has häzirkizaman stilinde boldy.
Telegram kontaktlar bilen işlemek üçin hem täze mümkinçilikleri goşdy. Ulanyjylar indi diňe özüne görünýän kontaktlar barada bellik edip, profil suratyny üýtgedip, doglan senesini goşmagy teklip edip biler. Premium ulanyjylar üçin fon we sowgat şekillerini ulanmak bilen profili bezemek, sowgatlaryň kolleksiýa görnüşlerini dolandyrmak we sowgatlary blokçeýne geçirmek mümkinçiligi peýda boldy.
EA botlaryny işläp düzüjiler üçin hem üýtgeşmeler bar. Indi bot bilen söhbetdeşligi mowzuk boýunça alyp barmak bolýar, jogaplar hakyky wagtda peýda bolýar, botlar bolsa ulanyjylara tölegli ýazylyşyklary we goşmaça funksiýalary teklip edip bilýär.
Şeýle-de, Telegram teklipler we ýalňyşlyklar barada nägilelikler üçin mini-programma hödürledi. Ozal munuň üçin aýratyn saýta geçmelidi, indi bolsa teklibi ýa-da ýalňyşlyk baradaky habary Telegram Ideas platformasy arkaly göni programmada iberip bolýar.
