Toyota özi üçin adaty däl usulda täze flagman superkarynyň ilkinji tizerini görkezdi. Kompaniýa dürli ýyllarda markanyň köp sanly belli modelleriniň synaglarynyň geçen ýeri bolan Ýaponiýadaky Fuji Speedway ýaryş ýolunda ulagyň suraty bilen uly banner ýerleşdirdi.
Onda üç awtomobil görkezilýär: 1967-nji ýylyň nusgawy Toyota 2000GT ulagy, 2010-njy ýylyň Lexus LFA superkary we Gazoo Racing (GR) bölümçesiniň nyşany bilen näbelli model. Ähli suratlar bir burçdan düşürilipdir, şonuň üçin faralaryň, öňdäki bamberiň bir bölegini we GR nyşanyny görüp bolýar.
Deslapky maglumatlara görä, täze ulag alýumin şassä, uglerod süýüminden kuzowa we iki turbinaly 4,0 litrlik V8 bilen elektrik hereketlendirijilerini birleşdirýän gibrid güýç enjamyna eýe bolar. Superkaryň 13-nji oktýabrda resmi taýdan görkezilmegine, köpçülikleýin görkezişiň bolsa aýyň ahyrynda Japan Mobility Show sergisinde bolmagyna garaşylýar.
Toyota entek modeliň adyny aýtmady, ýöne bannerde ýerleşdirilen Soul Lives On (“Ruh ýaşamagyny dowam etdirýär”) şygary 2000GT we LFA modelleri bilen baglanyşyga yşarat edip biler. Resmi däl maglumatlara görä, täze superkar GR bölümçesiniň ilkinji doly özbaşdak ulagy bolup, ýol we ýaryş wersiýasyna eýe bolar.
Ozal Toyota bu modeliň ýaşyrylan prototipini Gudwuddaky Tizlik festiwalyna getiripdi. Superkaryň premýerasyndan başga-da, kompaniýa 13-nji oktýabrda Century subbrendiniň täze taslamalary we Daihatsu kompaniýasy bilen hyzmatdaşlygyň täze tapgyry barada yglan edip biler.
