FIFA futbol boýunça dünýä çempionatyny adaty tomus möwsüminden başga pasla geçirmek mümkinçiligine seredýär. Bu barada guramanyň prezidenti Janni Infantino aýtdy.
Onuň sözlerine görä, gürrüň diňe bir ýaryş barada däl, eýsem umumy senenama täzeden garamak barada gidýär. “Ýewropanyň käbir ýurtlarynda iýul diýseň yssy bolýar. Futbol üçin iň gowy aý – iýun – Ýewropada asla ulanylmaýar diýen ýaly” – diýip, The Guardian onuň sözlerini getirýär.
Infantino oktýabr we mart aýlaryny “islendik ýerde oýnap boljak ählumumy aýlar” diýip atlandyrdy.
2034-nji ýylyň dünýä çempionatyny geçirmek hukugyny Saud Arabystany aldy we ol ýerde ýaryş, ähtimal, gyşda geçiriler. Tomsuna ýurtda temperatura +52 °C-a ýetýär. Şeýle çözgüt 2022-nji ýylda-da kabul edilipdi, şonda yssy howa sebäpli Katardaky çempionat noýabr – dekabr aýlaryna süýşürildi. Ýöne 2034-nji ýylda bu aýlara Remezan aýy gabat gelýär, şonuň üçin ýaryş 2035-nji ýylyň ýanwaryna süýşürilip bilner diýip, The Athletic habar berýär.
Öňümizdäki çempionat 2026-njy ýylda ABŞ-da, Meksikada we Kanadada geçiriler.
