Garyşyk başa-baş söweş sungatynyň irlandiýaly söweşijisi we UFC-niň öňki çempiony Konor Makgregor antidoping düzgünlerini bozandygy üçin 18 aý söweşlerden çetleşdirildi. Bu barada Absolýut söweş çempionatynyň (UFC) saýtynda habar berilýär.
Geçen ýyl Makgregor üç gezek – 2024-nji ýylyň 13-nji iýunynda, 19-njy we 20-nji sentýabrynda hökmany biologik nusgalary tabşyrmady. Antidoping edarasy (CSAD) muny türgeniň ýerleşýän ýeri barada maglumat bermek düzgünlerini bozmagy diýip hasaplady.
Gurama öňünden habar bermezden barlag geçirer ýaly, söweşijileriň hemişe ýerleşýän ýerini aýtmalydygyny belledi.
Çözgüt çykarylanda bu döwürde Makgregoryň şikesden soň dikelýändigi we söweşe taýýarlanýandygy göz öňünde tutuldy. Şeýle-de, onuň jogapkärçiligi boýun alyp, derňewde hyzmatdaşlyk etmegi hasaba alyndy. Şonuň netijesinde jeza möhleti alty aý azaldyldy.
Diskwalifikasiýa 2024-nji ýylyň 20-nji sentýabrynda başlady we indi 2026-njy ýylyň 20-nji martyna çenli dowam eder. Diýmek, söweşiji ozal ABŞ-nyň Prezidenti Donald Tramp tarapyndan yglan edilen Ak tamdaky söweşi sypdyrmaz. Ol 2026-njy ýylyň 14-nji iýunynda, amerikan lideriniň doglan güni geçiriler. Şol bir wagtyň özünde söweşe kimleriň gatnaşjakdygy entek belli däl. Makgregor söweşe isleg bildiren köp sanly söweşijileriň biri boldy.
37 ýaşly Makgregor ozal ýarym ýeňil we ýeňil agram derejelerinde UFC-niň çempionlyk guşaklaryna eýeçilik etdi. Onuň hasabynda 28 söweş bolup, olardan 22-sinde ýeňiş gazandy. Soňky gezek irlandiýaly söweşiji oktagona 2021-nji ýyla çykdy, şonda amerikaly Dastin Porýeden ýeňildi.
