Vittori atly italýan-amerikan kompaniýasy meşhur Pininfarina dizaýn öýi tarapyndan döredilen ilkinji Turbio atly giperkaryny tanyşdyrdy. Bu awtoulag diňe 50 sany çäkli nusgada öndüriler. Bahasy resmi taýdan yglan edilmedik bolsa-da, hünärmenler onuň takmynan 2,5 million dollar boljakdygyny çaklaýarlar.
Turbio-nyň dizaýny Bugatti, Lamborghini we McLaren ýaly meşhur superkarlardan ylham alýar. Döredijiler aerodinamik aýratynlyklaryň gowulandyrylmagyna üns berendigini belleýärler. Şeýle-de, sürüjä has “öwrenişikli” duýgy bermek maksady bilen salondaky köp sanly ekranlar we sensor paneller ýörite aýrylypdyr.
Platformasy baradaky jikme-jiklikler entek açylmady. Şeýle-de bolsa, Turbio-nyň uzynlygy, teker bazasy we gury agramy Lamborghini Revuelto bilen deňeşdirilýär. Görkezilen nusga häzirki wagtda önümçilige taýýarlanýan funksional konsept hökmünde görkezilýär.
Güýç gurluşy italýan Italtecnica kompaniýasy tarapyndan işlenip düzüldi. Ol 6,8 litrlik atmosfera V12 hereketlendirijisini we elektrik hereketlendirijisini birleşdirýär. Netijede, awtoulag takmynan 1100 at güýjüni berýär. Bu sazlaşyk giperkara 0-dan 100 km/s tizlige bary-ýogy 2,5 sekuntda çykmaga mümkinçilik berýär. Şeýle hem hereketlendiriji minutda 9000 aýlawa çenli pyrlanýar.
Gyzykly ýagdaý: Vittori ilkinji bildiriş tapgyrynda awtoulagyň dizaýnynyň taýýarlanyşynda emeli aňyň peýdalanylandygyny belläpdi. Ýöne kompaniýanyň resmi metbugat habarynda bu barada hiç hili maglumat ýok.
