Kataloniýanyň “Barselonasynyň” metbugat gullugy geçen möwsümiň maliýe netijeleri barada hasabat berdi. Klubuň operasion girdejileri 994 mln ýewro, arassa operasion girdeji bolsa bary-ýogy 2 mln ýewro boldy.
Bellenilişi ýaly, Nike bilen hemaýatkärlik şertnamasy kluba 259 mln ýewro getirýär.
Şol bir wagtyň özünde, “Barselona” öňki möwsümi (2023/24) 91 mln ýewro ýitgi bilen tamamlapdy.
Klub geçen möwsümde Ispaniýanyň çempiony boldy we UEFA-nyň Çempionlar ligasynda ýarym finala ýetip, Italiýanyň “Interinden” utuldy.
Täze möwsümde La Liganyň sekiz tapgyryndan soň kataloniýalylar ýaryş jedwelinde ikinji orny eýeleýär. Ondan öňde iki utuk aratapawut bilen Madridiň “Realy” bar.
