YouTube wideohosting hyzmaty ABŞ-nyň prezidenti Donald Trampyň hyzmatyň üstünden beren talap arzasyny çözmek üçin 24,5 million dollar tölemäge razy boldy. Bu barada kazyýet resminamalaryna salgylanýan Reuters habar berýär.
Trampyň YouTube-daky, Facebook-daky, Instagram-daky we Twitter-däki akkauntlary 2021-nji ýylyň ýanwar aýynda onuň tarapdarlary Kapitoliýä kürsäp girenden soň tizara petiklenipdi. Tramp kazyýetde bu çözgüde garşy çykdy.
Ylalaşygyň şertlerine görä, YouTube Ak tamdaky bal zalyny gurýan täjirçilik bolmadyk Trust for the National Mall guramasyna 22 million dollar tölär. Galan 2,5 million dollar Amerikan Konserwatiw Bileleşigini hem öz içine alýan beýleki talapkärleriň arasynda paýlanar.
Tramp YouTube-yň gelen kararyny "ýokary tehnologiýalar ulgamynda senzuranyň netijeleriniň bardygyny" subut edýän "uly ýeňiş" diýip atlandyrdy.
YouTube Trampyň akkauntlarynyň petiklenmegi bilen bagly onuň talap arzasyny sazlamak üçin millionlarça dollar tölemäge razy bolan üçünji uly tehnologiýa kompaniýasy boldy. Ondan öň Meta (Facebook-yň we Instagram-yň eýesi) Tramp-a 25 million dollar, X (öňki Twitter) bolsa 10 million dollar tölemäge razy bolupdy.
