Spotify emeli aňyň kömegi bilen döredilen aýdym-sazlar üçin täze düzgünleri girizýär. Üýtgeşmeleriň maksady aýdym döredilende EA-nyň ulanylandygyny aç-açan etmekden, spam bilen göreşmekden we rugsatsyz artistleriň sesine öýkünmegi gadagan etmekden ybarat.
Spotify DDEX standartyny girizýär, ol EA-nyň wokal döredilende, instrumental ýazylanda, işlenilende ýa-da postprodakşende, umuman, nirede ulanylandygyny titrlerde görkezmäge mümkinçilik berer. Leýbller, artistler we distribýutorlar bu maglumaty mümkin boldugyndan takyk görkezmeli bolar.
Spotify sesleriň rugsatsyz göçürilip alynmagyny we dipfeýkleri hem gadagan eder. Kompaniýa şeýle kompozisiýalary bozmagy we olaryň ýaýramagyny blokirlemegi maksat edinýär.
Güýzde hyzmat aýdym-saz spamy bilen göreşmek üçin täze süzgüji işe girizer. Ol şübheli aýdymlary ýüze çykaryp, olary bellik eder we tekliplerden aýrar. Kompaniýanyň maglumatlaryna görä, ozal platformadan 75 milliondan gowrak spam-trek aýryldy.
“Biz artistleri EA-ny jogapkärli ulanýandygy üçin jezalandyrmak islemeýäris. Biz bu öňkülerden has döredijilikli bolmaga mümkinçilik berer diýip umyt edýäris. Biziň maksadymyz bu ýerde ulgamy aldaýan kezzaplary saklamak” – diýip, Spotify-yň wize-prezidenti we global aýdym-saz bölümçesiniň ýolbaşçysy Çarli Hellman belledi.
Çözgüt EA-aýdymlarynyň meşhurlygynyň artmagy bilen baglanyşykly boldy. Şu tomusda emeli aňyň kömegi bilen döredilen Velvet Sundown topary şeýle aýdymlaryň aç-açan bellik edilmändigi üçin ulanyjylaryň nägileligine sebäp boldy. Spotify-yň bäsdeşi – Deezer hyzmaty ýakynda her gün ýüklenilýän aýdym-sazlaryň 18%-iniň, 20 müňden gowrak aýdymyň, indi doly EA-nyň kömegi bilen döredilýändigini habar berdi.
