1-nji oktýabra geçilen gije Türkmenistanyň çempiony we Kubogynyň eýesi – “Arkadag” futbol kluby AFK Çempionlar ligasy 2-niň toparlaýyn tapgyrynda ikinji oýnuny geçirdi. Arkadag şäherinden adybir topar myhmançylykda Bahreýniň “Al-Haldiýa” klubundan 0:2 hasabynda utuldy.
Oýun Riffa şäherindäki Milli stadionda geçirildi. Ýer eýeleri iki goly hem oýnuň birinji ýarymynda girizdi: 10-njy minutda Žoel Beýýa, 39-njy minutda Gleýson Moreýra tapawutlandy. Ikinji ýarymda, 53-nji minutda “Al-Haldiýanyň” oýunçysy Mussa Kulibali gyzyl duýduryş aldy, ýöne bu myhmanlara hasap açmaga kömek etmedi.
“B” toparçanyň beýleki bir oýnunda Kataryň “Al-Ahli” topary Özbegistandan “Andižan” kluby bilen deňme-deň oýnady – 0:0.
Iki tapgyrdan soň toparçada dört utuk bilen “Al-Haldiýa” öňde barýar. “Al-Ahli” bilen “Andižanyň” hersinde iki utuk, “Arkadagda” bir utuk bar.
Birinji tapgyrda türkmen topary öýünde “Andižan” bilen oýnady. Oýun golsuz deňme-deň tamamlandy.
Indiki oýunda “Arkadag” 22-nji oktýabrda Kataryň “Al-Ahlisi” bilen duşuşar. Oýun Dohadaky “Al-Tumama” stadionynda bolar.
