30-njy sentýabrda Arkadag şäheriniň stadionynda Türkmenistanyň «Ahal» futbol kluby AFK-2 Çempionlar ligasynyň toparçalaýyn bäsleşiginiň ikinji tapgyrynda Iordaniýanyň çempiony «Al-Husseýn» bilen duşuşdy. Oýun myhmanlaryň peýdasyna 1:4 hasabynda tamamlandy.
Ähli gollar duşuşygyň birinji ýarymynda geçirildi. «Al-Husseýn» çalt hüjümler bilen başlap, 16-njy minutda Andreý Bani hasaby açdy. Alty minut geçensoň, «Ahalyň» oýunçysy Elman Tagäýew garşydaşyň derwezesine penalti geçirip, hasaby deňledi. Ýöne 33-nji minutda albaniýaly hüjümçi Luis Kaçorri «Ahalyň» jerime meýdançasyndaky bulaşyklykdan peýdalanyp, toparyny öňe çykardy. 38-nji minutda Latir Fall tapawudy artdyrdy. Birinji ýarymyň goşmaça minutlarynda bolsa Kaçorri öz ikinji goluny geçirip, oýnuň ahyrky netijesini kesgitledi – 1:4.
Bu ýeňişden soň «Al-Husseýn» 6 utuk bilen «C» toparynyň liderligini saklady.
«Ahalyň» ýagdaýy bolsa «Mohun Bagan» hindi topary bilen bagly ýagdaý sebäpli kynlaşdy. Ilkinji tapgyrda türkmen topary Kalkuttada hindistanly garşydaşyny 1:0 hasabynda üstün çykypdy. Ýöne «Mohun Bagan» toparynyň diskwalifikasiýa edilmegi sebäpli bu duşuşyk güýjüni ýitirdi we «Ahalyň» 3 utugy aýryldy. Hindistanly topar sebäp hökmünde «Sepahan» bilen Eýrandaky oýna gitmekden ýüz öwürdi, howpsuzlyk meselesini we AFK tarapyndan kepillikleriň ýokdugyny görkezdi. «Mohun Bagan» Sport arbitraž kazyýetine ýüz tutdy, emma häzirlikçe ýaryşdan çykarylan ýagdaýynda galýar.
«Ahalyň» indiki duşuşygy 21-nji oktýabrda Arkadagda Eýranyň «Sepahan» toparyna garşy geçiriler.
1-nji oktýabrda bolsa ýene bir türkmen topary – ýurdumyzyň çempiony «Arkadag» «B» toparynyň çäginde öz oýnuny geçirer. Ol Bahreýnde ýerli «Al-Haldiýa» topary bilen duşuşar.
