NASA 2025-nji ýylda astronawt bolmaga dalaş edýän 10 adamyň adyny yglan etdi. Agentligiň taryhynda ilkinji gezek zenanlar erkeklerden köp boldy: alty zenan, dört erkek.
Bäsleşige gatnaşmak üçin 8 müňden gowrak amerikaly arza tabşyrdy. Saýlanan dalaşgärler iki ýyl okar, şondan soň Ýere golaý orbita uçmaga, şeýle-de, Aý we Mars missiýalaryna gatnaşmaga dalaş edip biler.
Programmanyň iň ýaş gatnaşyjylary Nýu-Ýorkdan 34 ýaşly Imelda Mýuller we Kentukkiden Erin Owerkeş boldy.
Okuw dürli ugurlardan bolar. Geljekki astronawtlara robototehnika, geologiýa, kosmos lukmançylygy we fiziologiýa boýunça sapaklar, daşary ýurt dillerini öwrenmek we gury ýerde hem-de suwda diri galmak başarnyklaryny türgenleşdirmek garaşýar. Mundan başga-da, olar açyk kosmosa çykmaga taýýarlyk görer we reaktiw uçarlarda uçar.
