Lamborghini Urus Germaniýanyň Mansory atelýesi tarapyndan döredilen Venatus wersiýasyny aldy. Bu dünýäde iň kuwwatly we iň tiz krossower boldy, ol bary-ýogy 2,8 sekuntda tizligini 100 km/sag çenli artdyrýar, iň ýokary tizligi bolsa 332 km/sag ýetýär.
Esas hökmünde Urus SE gibridi alyndy. Mansory-nyň hünärmenleri hereketlendirijiniň kuwwatyny 800 at güýjünden 1100 at güýjüne çenli, aýlanma güýjüni bolsa 950-den 1250 Nm çenli ýokarlandyrdy. Ulag sport awtomobillerindäki ýaly gaty sesli gaz çykaryjy turba bilen üpjün edildi, dizaýn agressiw görnüşde ýerine ýetirildi.
Krossower karbon kapota we goşmaça elementlere, mämişi bezeg goşundylaryna we birbada iki anti-ganata eýe boldy. 24 dýuýmlyk FC.5 süýme diskleri oturdyldy – öňde 295/30 R24 we yzda 355/25 R24.
Salon hem gaýtadan işlendi: interýer ýiti mämişi öwüşginler bilen deriden, zamşadan we karbondan taýýarlandy. Potolok yşyklandyrmasy “ýyldyzly asmanyň” stilinde döredildi.
Mansorynyň resmi saýtynda habar berlişi ýaly, Venatus modeli çäkli nusgada çykarylar.
