FIFA 2026-njy ýylyň futbol boýunça dünýä çempionatynyň üç resmi tumaryny hödürledi. Ýaryşyň nyşanlary ak kelleli bürgüt Klatç, los Meýpl we ýaguar Zaýu boldy. Olar çempionaty kabul etjek üç ýurdy – ABŞ-ny, Kanadany we Meksikany görkezýär.
Her personaž öz ýurdunyň medeniýeti bilen baglanyşykly. Meýpl Kanada boýunça syýahat edip, adamlary birleşdirýär we olary ýurduň medeniýeti bilen tanyşdyrýar. Zaýu Meksikanyň jeňňellerinden geldi we meksikan halkynyň hyjuwyny we däp-dessurlaryny alamatlandyrýar. Klatç ABŞ-nyň asmanynda gaýyp, optimizmi we dürli medeniýetlere açyklygy görkezýär.
Tumarlaryň hatda futbol orunlary hem bar: Meýpl – derwezeban, Zaýu – hüjümçi, Klatç bolsa meýdançanyň merkezindäki pleýmeýker.
“Bu personažlar dünýä çempionatynyň özi ýaly şatlyk, güýç we agzybirlik ruhy bilen gurşalan” – diýip, FIFA-nyň prezidenti Janni Infantino belledi.
2026-njy ýylyň dünýä çempionaty taryhda iň ulusy bolar – ilkinji gezek oňa 48 ýygyndy gatnaşar, oýunlaryň sany bolsa 104-e çenli köpeler. Ýaryş 11-nji iýunda Mehikoda açylar, final oýny 19-njy iýulda Nýu-Jerside bolar. Dünýä çempionatynyň taryhynda ilkinji gezek aýgytly oýnuň arakesmesinde tomaşaçylara şüweleň garaşýar.
