Mercedes-Benz çäkli V12 Edition seriýasy bilen kaşaň Mercedes-Maybach S 680 sedanyny görkezdi. Bu wersiýa 12 silindrlik hereketlendirijä bagyşlanýar. Önümçilik bary-ýogy 50 nusga bilen çäklenýär, olary döretmäge bolsa Manufaktur bölümçesi jogap berýär.
Awtomobil iki reňkli boýagy: zeýtun reňkli üsti we obsidian-gara reňkli aşagy bilen tapawutlanýar. Olaryň arasyndan inçe metal zolak geçýär. Boýag üçin on gün diýen ýaly wagt sarp edilýär. Iki M harply Maybach nyşanyna 24 karat altyndan ýasalan medalýon goşuldy. Tigirler eksklýuziw zeýtun reňkde ýerine ýetirildi.
Salon goňur nappa derisi we hoz agajy bilen bezeldi. Agaç bölekleri rulda hem ulanyldy. Merkezi konsolda anyk nusganyň belgisi goýuldy, potolok romb görnüşli nagyş, yzky konsol bolsa bir hepdeläp taýýarlanýan altyn haşam bilen bezeldi.
Topluma aksessuarlar hem girýär: kümüş çaýylan haşamly fužer, bagaž ýeri üçin halyça, açar we brelok üçin guty.
Kapotyň aşagynda 612 at güýjüni we 900 Nm aýlanma güýjüni berýän alty litrlik V12 hereketlendirijisi oturdyldy. Ol 2,4 tonna agramly sedanyň 4,5 sekuntda tizligini 100 km/sag çenli artdyrmagyna mümkinçilik berýär, iň ýokary tizlik 250 km/sag bilen çäklenýär. Hereketlendiriji dokuz basgançakly “awtomat” we doly herekete getiriji bilen işleýär.
