Tennessi ştatynyň uniwersitetinde Grand Theft Auto oýunlarynyň üsti bilen ABŞ-nyň 1980-nji ýyldan bärki taryhyny öwretjek kurs peýda bolar. Kursy taryh professory Tore Olson işläp taýýarlady we özi alyp barar. Bu barada ol IGN bilen söhbetdeşlikde gürrüň berdi.
Mugallym GTA-nyň soňky 45 ýylyň taryhy wakalaryny, şäher we oba ýerlerini, gahrymanlary we sýužetleri seljermek üçin gural hökmünde ulanylýandygyny belledi. Onuň aýtmagyna görä, oýun hakyky prosesleri ara alyp maslahatlaşmaga mümkinçilik berýär. Şol bir wagtyň özünde, oýun satira bolup, onda käbir ýoýulmalar bar. Mysal üçin, onda şäher etegi ýok diýen ýaly, zenanlar, köplenç, ahlaksyz görnüşde, akýagyzlardan galan personažlar bolsa, köplenç, jenaýatçy hökmünde görkezilýär.
Şonuň bilen birlikde hakykat bilen gabat gelýän takyk pursatlar hem bar: Los-Santosyň, Liberti-Sitiniň we Waýs-Sitiniň portlary ABŞ-nyň ykdysadyýetinde konteýner gatnawlarynyň ähmiýetini görkezýär.
San Andreas hem muňa mysal bolup biler: bu ýerde sýužet wakalary 1992-nji ýylda Los-Anjelesdäki bidüzgünçilikleri görkezýär. Kursda talyplar immigrasiýa, jenaýatyň derejesi, kapitalizm we syýasat ýaly wakalaryň düýp mazmunyna düşünmäge çalşar.
Hasap üçin talyplara oýny geçmek gerek däl – professor öz leksiýalarynda diňe oýnuň käbir böleklerini we ekran suratlaryny ulanar. “Grand Theft America: GTA oýnunyň üsti bilen ABŞ-nyň 1980-nji ýyldan bärki taryhy” atly kurs 2026-njy ýylyň 20-nji ýanwarynda başlar. GTA 6-nyň reliziniň süýşürilendigi sebäpli professor ony maksatnama goşmazlyk kararyna geldi.
