“Garri Potter” boýunça täze serialda Wolan-de-Mortuň keşbi üçin diňe bir erkekler däl, eýsem zenanlar hem göz öňünde tutulýar. Bu barada tanymal golliwudly insaýder Deniel Rihtman X sosial ulgamyndaky sahypasynda habar berdi.
Onuň maglumatlaryna görä, serialda zalymyň zenan görnüşi-de peýda bolup biler. Ozal KHBS bu rol üçin Killian Mýorfiniň dalaşgärdigini aýdypdy, ýöne aktýor özüniň taslama gatnaşýandygy baradaky habary ret etdi.
Wolan-de-Mortuň keşbi üçin takyk dalaşgärler entek belli däl. HBO-nyň serialynyň premýerasy 2027-nji ýyla meýilleşdirilýär we aktýorlaryň esasy düzümi eýýäm yglan edildi. Garri Potteri Dominik Maklaflin, Rony – Alaster Staut, Germionany – Arabella Stenton oýnar. Drako Malfoýyň keşbini Loks Pratt ýerine ýetirer.
Beýleki aktýorlaryň arasynda şular bar: Jon Litgou (Albus Dambldor), Janet Maktir (Minerwa Makgonagall), Paapa Essýedu (Sewerus Snegg), Nik Frost (Rubeus Hagrid), Berti Karwel (Kornelius Faj), Jonni Flinn (Lýusius Malfoý). Bel Pauli bilen Deniel Rigbi bolsa ekranda Petuniýany we Wernon Durslyny janlandyrar.
Mundan başga-da, professor Flitwigiň keşbine Uorwik Dewis gaýdyp geler. Serialda Elaýja Oşin (Din Tomas), Finn Stiwens (Winsent Krebb) we Uilýam Neş (Gregori Goýl) hem peýda bolar.
