ABŞ-da ençeme ýyl dowam eden gözleg işlerinden soň alymlara baryp 1886-njy ýylda suwuň düýbüne giden F.J.King gämisiniň heläkçilige uçran ýerini tapmak başartdy. Ol häzire çenli göze ilmändigi sebäpli “ruh-gämi” diýlip atlandyrylypdy diýip, Associated Press habar berýär.
Gämi Wiskonsin taryhy jemgyýetiniň we Wiskonsin suwasty arheologiýa assosiasiýasynyň bilelikdäki tagallalary bilen Beýlis-Harboryň golaýyndaky Miçigan kölüniň akwatoriýasynda tapyldy.
Üç bogaldakly kese ýelkenli gämi 1886-njy ýylyň 15-nji sentýabrynda güýçli tupan wagty heläkçilige uçrapdy. Ol Eskanabadan Çikago demir magdanyny äkidip barýardy. Kapitan Uilýam Griffin gäminiň kenardan sekiz kilometr uzaklykda suwa gidendigini aýtdy, ýöne maýak gözegçisi gäminiň bogaldagyny gury ýere has golaýda görendigini nygtady.
Görkezmelerdäki bu çaprazlyklar hem uzak wagtlap gämini tapmakda päsgelçilik döretdi. Ahyrynda maýak gözegçisiniň aýdanlary dogry bolup çykdy – döwrebap gapdal skanirleme enjamy onuň görkezen ýerinden bir kilometr uzaklykda gäminiň galyndylaryny tapdy.
Suwuň düýbünde 139 ýyllap ýatan gäminiň korpusy gowy saklanypdyr. Ylmy gözlegçiler agyr ýük sebäpli gäminiň diňe döwük böleklerini tapmaga garaşypdy. “Käbirlerimiz biri-birimizi dürtmeli bolduk. Biz ähli geçenki gözleglerden soň ony, hakykatdanam, tapandygymyza ynanyp bilmedik” – diýip, baş gözlegçi Brendon Beýllod belledi.
