Amerikan biotehnologiýa startapy Colossal Biosciences inc. XVII asyrda ýitip giden dodo guşuny gaýtadan janlandyrmaga çalyşýar. Kompaniýa eýýäm munuň üçin 120 mln dollar maýa goýum çekdi diýip, Bloomberg habar berýär.
Alymlar bäş-ýedi ýylyň içinde dodony gaýtadan döretmegi meýilleşdirýär. Olar birinji tapgyrda dodonyň iň ýakyn garyndaşy hasaplanýan kepderileriň ilkinji jyns öýjüklerini ösdürip ýetişdirdi.
Maýa goýumlaryň bir bölegi Tehasda guşlary öwrenmek boýunça merkeziň gurluşygyna sarp ediler.
Dododan başga-da, Colossal Biosciences inc. tüýli syçany we möjekleriň ýitip giden görnüşini (direwolf) gaýtadan döretmek bilen meşgullanýar, şeýle-de plastik galyndylary gaýtadan işlemek we programma üpjünçiligini döretmek boýunça taslamalary durmuşa geçirýär.
Dodo ýa-da Mawrikiý dronty barada ilkinji gezek 1598-nji ýylda agzalyp geçildi. Guşlar uçmaýan bolup, köplenç, aç deňizçileriň we ada getirilen haýwanlaryň awyna öwrülipdir. Soňky gezek dodony 1662-nji ýylda gördüler.
Görnüşiň ýitip gitmegi uzak wagtlap rowaýat hasaplanypdy. Diňe 1840-njy ýyllarda Ýewropa getirilen galyndylary öwrenmegiň netijesinde dodolaryň, hakykatdanam, bolandygy we kepderiler maşgalasyna degişlidigi anyklandy.
