Britaniýanyň Quantum Motion startapy pudakda ilkinji kremniý CMOS çiplerinde kwant kompýuteriniň işläp başlandygyny habar berdi. Onuň prosessorlary ýarym geçirijileriň pudagynda ulanylýan adaty 300-mm plastinalary bilen klassyk tehnologiýalar boýunça döredilýär.
Şeýle çemeleşme ulgamyň gerimini giňeltmäge mümkinçilik berip, kwant hasaplamalaryny iş ýüzünde ulanmaga ýakynlaşdyrýar.
Kompaniýa ilkinji gezek özüni 2022-nji ýylda, spin kubitlerine esaslanýan 1024 kubit prosessorynyň taslamasyny hödürlemek bilen tanatdy. Şeýle ulgamlarda kwant ýagdaýy elektron spinlerinde saklanýar, olary dolandyrmak bolsa hasaplaýyş amallaryny ýerine ýetirmäge mümkinçilik berýär. Bu arhitektura häzirki tehprosesler bilen gabat gelýär we giňeltmek üçin amatlydyr.
Quantum Motion-yň ulgamy üç adaty serwer sütüninde ýerleşýär, kriogen enjamlary hem şol görnüşde ýerine ýetirildi. Bu maglumat merkezlerinde kompýuteriň ulanylmagyny aňsatlaşdyrýar. Ilkinji ulgam eýýäm döwlet gaznalarynyň we DARPA agentliginiň goldaw bermeginde Beýik Britaniýanyň Milli kwant hasaplaýyş merkezinde gurnaldy.
Kompaniýanyň prezidenti we tehniki müdiri Hýugo Saleh Quantum Motion-yň täjirçilik taýdan peýdaly kwant kompýuterlerini şu onýyllykda bazara çykarmagy göz öňünde tutýandygyny belledi.
